அடிமைகள் கூட்டமே கேளுங்கள்

கல்வியில் சிறந்தயெம் தமிழ்நாடே
  கரூஉரில் நிகழ்ந்ததை என்னயென்பாய்
தொல்லைகள் எத்தனை எத்தனையோ
  தோன்றிய எண்ணில் பொழுதுகளில்
அல்லல் அறுத்திட வந்தானா
  அறத்துடன் எதும்விஜய் செய்தானா
வல்லவன் தளபதி இதுவரையில்
  வளர்தமிழ் மண்ணுக் கென்னசெய்தான்

நடிகனைக் காவலன் என்றெண்ணி
  நற்சொல் பாட்டுக்கு மயங்கிவரும்
அடிமைகள் கூட்டமே கேளுங்கள்
  ஆட்டுமூளை இனமே பாருங்கள்
நடிகனின் மகன்மகள் வந்தனரா
  நடிகனின் மனைவியும் வந்தாரா
நடனங்கள் ஆடிடும் குரங்கினமே
  நடிப்பது அவன்தொழில் புரிகிறதா

குழந்தைகள் அழைத்துப் போனீரே
  கூத்தாடிக் காணத் துடித்தீரே
பலபல பளபள கதைசொன்னான்
  பாட்டுகள் பாடியே உயர்நின்றான்
தளபதி தளபதி என்றீரே
  தாகம் பசியெலாம் மறந்தீரே
இழப்பினில் நீங்கள் கதறுகையில்
  இல்லத்துள் ஒளிந்தான் தளபதியே

அரசியற் காரர்கள் அனைவருமே
  அறுவடை செய்யவே வருகின்றார்
தருகின்றார் உயிருக்குக் காசோலை
  தந்திரம் அதில்பல செய்கின்றார்
அருந்தமிழ் மண்ணின் மைந்தர்களே
  அறிவைக் கொஞ்சம் பயன்படுத்தி
இருளுல கிருந்து வெளிவாரீர்
  இனியெவனும் நம்பிச் சாகாதீர்

அரசியற் காரன்தம் பிள்ளைகளை
  அழகாய்க் காத்து வளர்த்திடுவான்
அருந்தமிழ் என்றே குரைத்தாலும்
  ஆங்கிலக் கல்வியே கொடுத்திடுவான்
வருவான் விலைஉயர் ஊர்திகளில்
  வாயை விற்றுப் பிழைப்பதற்கே
தருவான் என்புத் துண்டுனக்குத்
  தற்குறி நீயெனக் குறிப்பதற்கே

திரைப்பட நாயகர் பின்னாலும்
  தித்திப்புச் சொற்பேசிப் பின்னாலும்
கிரிக்கெட்டா டுபவன் பின்னாலும்
  கிறுக்குப் பிடித்து அலையாதீர்
பிரிவினைத் தூண்டும் வெறியர்க்கும்
  பேராசை பிடித்த அரக்கர்க்கும்
உருகிப் பேசுபவர் நடிப்புக்கும்
  உயிரைப் பரிசாய்க் கொடுக்காதீர்

அரசியல் வாதிகள் அனைவருமே
  அரங்கேற்றுவர் பல்வகை நாடகமே
பெருமை தேடியே அலைந்திடுவர்
  பெரும்பொருள் குவிக்கவே வாழ்ந்திடுவர்
அறிவிலி என்றுனை நகைத்திடுவர்
  அறமா? அதுயாதெனக் கேட்டிடுவர்
அறியாமைத் தீயிலுன் தலையிட்டு
  அன்றாடம் வேள்விகள் நடத்திடுவர்

உங்கள் உழைப்பில் வாழ்பவர்தாம்
  உம்மை ஆளும் ஆட்சியர்கள்
உங்கள் பொருளில் பிழைப்பவர்தாம்
  உம்மை மயக்கும் நாயகர்கள்
உங்கள் அன்பைச் சுரண்டிவிட்டு
  உமக்கே கூற்றுவன் ஆகிடுவர்
உங்கள் அரசியல்வாதி எல்லாம்
  உமக்குப் பணியாள் மறவாதீர்

அருந்தமிழ் நாட்டு அரசியலில்
  அறமுடைத் தலைவன் எவனுமிலை
இருந்தனர் அண்ணா காமராஜர்
  இன்றிங்கு அவர்போல் யாருமில்லை
திருடிப் பிழைக்கவே கட்சிவைக்கும்
  தீராத் துயரே தமிழ்நிலனில்
செருக்குடன் வாழும் தமிழினமே
  திரைப்படம் மெய்யல புரிவீரே

உயிரைக் குடிக்கும் கூற்றுவன்போல்
  உயரே பறந்தே வந்திடுவான்
பயிரை மேயும் வேலியைப்போல்
  பல்கதை சொல்லி மயக்கிடுவான்
துயரைத் துடைப்பது போல்வந்து
  சுயநலம் காண நடித்திடுவான்
கயவர் சொற்களில் தொலையாதீர்
  கல்லாப் பறழாய்த் திரியாதீர்

மறவர்க் குடியில் பிறந்தவரே
  மண்டையுள் களிமண் ஏற்றாதீர்
அறிவைத் தொலைத்து வாழாதீர்
  அரசியல் வாதிகள் நம்பாதீர்
உறவுகள் பேணிக் காத்திடுவீர்
  உண்மை உணர்ந்து செயல்படுவீர்
குறைகள் கண்டால் சீறிடுவீர்
  குரங்காய் வாழ மறுத்திடுவீர்

– புவனா கருணாகரன்